الأحد، 6 نوفمبر 2011

م الأخر في شرح انتخابات نقابة المهندسين المصرية. الجزء الثاني (برامج المرشحين)

في الجزء الأول عملت ملخص لخطوات العملية الأنتخابية و لقيت أسئلة كتير بتسألني "هننتخب مين؟؟؟" فقررت أجمع كل برامج المرشحين اللي أقدر أجمعهم و أحطهم في البوست ده عشان يكون مرجع.


بس مبدأياً لازم نعرف اسماء السادة المهندسين المرشحين لمنصب النقيب والمناصب الاخري بالنقابة العامة و هنلاقيهم علي اللينك ده
http://www.eea.org.eg/elect_eng/elect_eng12-1.HTM

اسماء السادة  المهندسين المرشحين لمنصب النقيب والمناصب الاخري بالنقابات الفرعية
http://www.eea.org.eg/elect_eng/elect_eng12-2.HTM

اسماء السادة المهندسين المرشحين للمناصب الأخري (الشُعب) بالنقابة العامة
http://www.eea.org.eg/elect_eng/elect_eng12-3.HTM



نبدأ بعرض لينكات البرامج الأنتخابية المتاحة إلي الأن:
السير الذاتية و البرامج لمنصب النقيب  العام المعلن عنها علي  موقع النقابة:
http://www.eea.org.eg/elect_eng/elect_eng19.HTM



  • البرنامج الأنتخابي لمجموعة "مهندسون ضد الحراسة":
الصور دي فيها برنامج مرشح النقيب و هو المهندس طارق النبراوي








 صفحة "مهندسون ضد الحراسة"  علي فيس بوك للحصول علي جميع  المعلومات عن مرشحين الأعضاء المكملين و الشُعب:
https://www.facebook.com/efis.eg?sk=notes






  • و اخيراً النوت دي ممكن نلاقي فيها اي تحديثات او برامج جديدة



https://www.facebook.com/notes/%D9%85%D8%B1%D8%B5%D8%AF/%D9%85%D8%B1%D8%B4%D8%AD%D9%8A%D9%86-%D9%86%D9%82%D8%A7%D8%A8%D8%A9-%D8%A7%D9%84%D9%85%D9%87%D9%86%D8%AF%D8%B3%D9%8A%D9%86/213931512013621

في النهاية أرجو من كل مهندس أنه يبحث و يختار بعناية من يمثله و بأقتناع كامل  وارجوك متكسلش تدور!


 و أرجو أن اي شخص يعرف برامج غير الموجودة هنا أنه يتفضل و يحطلي روابطها في صورة تعليق تحت البوست ده حتي تعم الفائدة علي كل المهندسين... لو البوست ده زودلك معلومة من فضلك أنشره...شكراً



الأحد، 30 أكتوبر 2011

م الأخر في شرح انتخابات نقابة المهندسين المصرية


طبعاً كلنا عارفين أن أنتخابات نقابة المهندسين علي الأبواب (يوم 25 نوفمبر) و معظمنا منعرفش حاجات كتير عن نقابة المهندسين, و دورها ايه.. و ايه الفايدة اللي هتعود عليا من الأنتخابات. هنحاول نشوف ده في البوست دي.

اول حاجة هنعرفها ايه دور نقابة المهندسين
للأجابة علي هذا السؤال هقتبس الجزء المختص بالتعريف بأهداف النقابة من قانون نقابة المهندسين:

إنشاء النقابة وأهدافها
مادة 2- تعمل النقابة على تحقيق الأهداف التالية :

1- الارتقاء بالمستوى العلمي والمهني للمهندسين والمحافظة على كرامة المهنة ووضع وتطبيق الأسس الكفيلة بتنظيم ممارسة المهنة وأداء أعضاء النقابة لواجباتهم في خدمة البلاد ومراقبة تنفيذها.
2-  تعبئة قوى أعضاء النقابة وتنظيم جهودهم في خدمة المجتمع لتحقيق الأهداف القومية وأهداف التنمية الاقتصادية ومواجهة مشكلات التطبيق واقتراح الحلول المناسبة لها والاشتراك الايجابي في العمل الوطني.
3-   تنمية روح الإخاء والتعاون بين أعضاء النقابة والعمل على رفع مستوى الأعضاء من النواحي الهندسية والاجتماعية والمادية وتامين حياتهم ورعاية أسرهم اجتماعيا واقتصاديا وصحيا وثقافيا.
4- الإسهام في دراسة خطط التنمية الاقتصادية والمشروعات الصناعية والهندسية.
5-  المساهمة في تخطيط برامج ومناهج بحيث تساير حاجات المجتمع وتخدم مصالحه وتفي بمتطلباته.
6-  العمل على تنمية ونشر البحوث والدراسات في مختلف المجالات الهندسية وربط البحوث العلمية والهندسية بمواقع الإنتاج وذلك بدراسة أساليب الإنتاج ووسائل تحسينه وزيادته وتخفيض تكاليفه.
7- التعاون مع المنظمات والجمعيات الهندسية الداخلية والخارجية وعلى الأخص في البلاد العربية والأفريقية والآسيوية وتوثيق الروابط بينها وتبادل المعلومات والخبرات ويشمل ذلك الاشتراك في دراسة الموضوعات والمشروعات ذات الطابع المشترك وكذلك الاشتراك في المؤتمرات الدولية التي ترتبط بهذه الأهداف والتي تعقد بالخارج والعمل على عقدها بالبلاد.
8-  تيسير الإسكان وبناء عمارات سكنية للمهندسين بالقاهرة والمحافظات من مالها الخاص , وذلك للأوضاع والشروط التي يحددها لنظام الداخلي للنقابة.
9-  العمل على نشر الوعي الهندسي وتنظيم الإشراف على المكاتب الهندسية والمكاتب الهندسية الاستشارية.

جميل جداً.. يعني النقابة هتخدمني كمهندس في ايه؟
الصورة دي فيها ملخص لدور النقابة تجاه المهندس و تجاه مهنة الهندسة و تجاه الوطن.


طيب أزاي اشترك في النقابة؟
لازم تكون متخرج من جامعة حكومية مصرية أو اي جامعة معادلة لشهادة بكالوريوس الهندسة. و بتروح النقابة و معاك بطاقتك و شهادة تخرجك و تشترك و يتم تجديد الأشتراك سنوياً. عشان تقدرتصوت لازم تكون مسدد الأشتراك علي الأقل لحاد سنة 2010 و خلي بالك أن أخر ميعاد للأشتراك او تجديد العضوية هو 15 نوفمبر, عشان تقدر تشارك في الأنتخابات!

بيقولوا أن دي أول انتخابات لنقابة المهندسين بعد رفع الحراسة عنها,,, هو ايه موضوع الحراسة ده و هيفرق في ايه انها اترفعت؟

تم فرض الحراسة علي النقابة منذ 16 سنة  نتيجة لخلاف سياسي حاد حدث بين المجلس القديم للنقابة (كان يتكون من الأخوان المسلمين و حلفاءهم) و الدولة مما ادي لصدور حكم قضائي جائر غير قانوي بموجبه فرضت الدولة سيطرتها علي النقابة.. و الحراسة تعني أنه قد تم الغاء الانتخابات فلا يوجد نقيب للمهندسين ...ولا يوجد مجالس نقابية ..بل مجرد فرد أو مجموعة أفراد تم تعيينهم لتسيير الأمور ..بمعنى ... يعطوا مرتبات الموظفين ... يعملوا صيانة للكهرباء والسباكة ... لا يملكون من أمرهم شيئا ..فهم مجرد موظفين ليسوا منتخبين ولا يمثلون المهندسين فقد عينتهم الدولة ...فإذا خرجوا عن دورهم المحدد ..فللدولة أن تعزلهم ..وتعين غيرهم و طبعاً  ..ً هذه الوصاية ادت لتدهور دور النقابة في جميع المجالات 

المزيد عن تدهور دور النقابة بسبب الحراسة:

في السنوات الأخيرة علت الأصوات للمطالبة بأستقلال النقابة و لعل من ابرزها مجموعة مهندسين ضد الحراسة , و بأختصار ان بعد هذه المساعي و الكفاح  و الضغط و الأعتصام امام النقابة تم رفع الحراسة عن النقابة بحكم قضائي صدر يوم 14 اغسطس 2011.



 لمزيد عن موضوع رفع الحراسة 

بعدها بتروح يوم 25 نوفمبر لمقر لجنتك الأنتخابية و هيدوك 5 ورقات للتصويت  هنشوف تقسيمهم في الصور دي:

اول ورقة خاصة بنقيب المهندسين و هتختار منها شخص واحد بس 
 تاني ورقة خاصة بأنتخاب الأعضاء المكملين و عددهم 11 عضو مقسمين 2 عضو لكل من (مدني-عمارة-ميكانيكا-كهرباء,) و عضو واحد لكل من (كيمياء-غزل-بترول) و خلي بالك أنك مطلوب منك تنتخب ال11 عضو كاملين مش اعضاء شعبتك بس.

 ثالث ورقة أنتخاب الشُعب ( مدني-عمارة-ميكانيكا-كهرباء) و دول الأربع شُعب الكبيرة و لهم 15 عضو, و الثلاث شعب الصغيرة ( كيمياء-غزل-بترول) و دول لهم 11 عضو.. لو أنت من الشعب الكبيرة هتنتخب 15 عضو فقط لو أنت من الشعب الصغيرة هتنتخب 11 عضو فقط .
  رابع ورقة أنتخاب رئيس النقابة الفرعية و بيكون شخص واحد فقط تبعاً لنقابتك الفرعية
 خامس ورقة أنتخاب أعضاء النقابة الفرعية و عددهم 14 عضو و بيكون أختيار عام بصرف النظر عن الشُعب
ملحوظات: مرشح فوق السن: أي يتمتع بأكثر من 15 سنة خبرة.
            مرشح تحت السن: أي يتمتع بأقل من 15 سنة خبرة.
            أعضاء الشعب الكبيرة (مدني- ميكاميكا- عمارة -كهرباء) سيقومون بالتصويت علي اختيار إجمالي 42 مرشح 
             أعضاء الشعب الصغيرة (غزل-كيمياء-بترول ) سيقومون بالتصويت علي اختيار  إجمالي 38 مرشح
           


و بعد كده تطبق الورق و تحطه في الصندوق... و بكده يكون تم تكوين الهيكل النقابي اللي هيبقي كالتالي:

ده بأختصار سير العملية الأنتخابية و لو عندك أي سؤال ممكن تبعته علي صفحة مبادرة مرصد من أجل استقلال نقابة المهندسين:
https://www.facebook.com/Marsad.Engineers
ملحوظة: مباردة مرصد لا تتبع أي تيار لكن هي مبادرة شبابية حيادية للأشراف علي استقلال نقابة المهندسين و الأنتخابات.


جميل جداً.. بعد كل ده السؤال المهم هو أنا هنتخب مين؟؟؟
إجابة السؤال ده عندك أنت,, بعد ما عرفت أهمية نقابتنا و المشاركة فيها يبقي لازم تنتخب حد تضمن انه هيمثلنا في النقابة و يستعيد دورها الرائد ... إلخ 
دي مسئوليه كل حد فينا انه يحاول يعرف مين المرشحين و يذاكر برامجهم كويس و يختار افضلها,, و اوعي تنتخب حد عشان "بيقولوا عليه كويس"... أنت اللي تحكم بنفسك!

و في النهاية ارجو أن اي شخص توصل لمعلومة بخصوص الأنتخابات يعرفها لبقية الناس و لو حد استفاد من البوست ده ينشره لتعم الفائدة ..و شكراً.

أقرأ ايضاً الجزء الثاني الخاص ببرامج المرشحين لأنتخابات النقابة
http://mella5er.blogspot.com/2011_11_01_archive.html

السبت، 23 يوليو 2011

يوم في حب مصر- زيارة لقرية العشر الأف في محافظة البحيرة ج1




بعد ما عملنا حركة اسمها مصربكرة  للتوعية في الشارع بمفاهيم ما بعد الثورة, و خدمة المجتمع كان أول نزول لينا في الشارع بصفة مستقلة هو يوم في حب مصر في قرية العشر الاف فدان في النوبارية- محافظة البحيرة علي طريق مصر اسكندرية الصحراوي. اليوم بدأ بقافلة طبية مجانية لخدمة أهالي القرية اللي لك أن تتخيل أنهم معندهومش  حتي مستوصف طبي, و أن وجد عيادات طبية فحدث و لا حرج كشوفات غالية جداً و خدمة متدنية و مهنية الأطباء شبه منعدمة, و لو شخص من الأهالي تعب في نصف الليل عشان يتعالج يروح العامرية  أو يروح اسكندرية يعني لو واحدة حامل و وقت الولادة جيه هتولد في السكه قبل ما توصل اسكندرية!!. المهم بعد أنتهاء صلاة الجمعة بدأ توافد الأهالي بأعداد كبيرة للقافلة الطبية, زي بالضبط الغريق اللي أتعلق بقشاية, الناس عيانة و مش معاهم فلوس يتعالجوا أو معاهم فلوس بس مفيش خدمة طبية في القرية فا كله محصل بعضه, و كل الناس اللي كانت بتيجي كانوا عائلات يعني الراجل و مراته و اولاده, أثناء أنتظار الأهالي للكشف كنا بنتكلم معاهم عن مشاكلهم و نشوف أراءهم في كل شئ بيحصل...
أول حاجة كل الناس بلا استثناء بتشكي من عدم توافر الخدمات الطبية, معظم الستات في القرية مبيعرفوش يقروا و يكتبوا و نفسهم في فصل محو الأمية و قالولي أنهم طلبوا ميت مرة عمل فصل محو أمية و كل المسئولين كانوا بيطنشوا, نفسهم يتعلموا عشان يساعدوا اولادهم في المدارس و واحدة منهم قالتلي "أنا لو بتعلم مش هاروح اشتغل عند حد في البيوت" و واحدة تانية حكتلي عن قريبتها اللي  انضحك عليها و اتسرقت عشان هيا جاهلة و بصّموها علي عقود بيع و اتخرب بيتها...
الستات حكولي عن صعوبة العيشة: واحدة معاها ولد و بنت في المدارس و جوزها بيشتغل شيال باليوم, من فترة جوزها انكسر و قعد في البيت و هيا لفت تشحت عليه عشان هيا مش بتشتغل, سألتها ليه؟! هو مفيش صندوق تكافل في القرية؟ قالتلي: و لا بيقدروا حاجة قالولي مالكيش فلوس عشان عندك راجل. قولتلها: طب ليه متعمليش اي مشروع صغير زي مثلاً أنك تخبزي عيش و فطير و تبيعيهم, قالتلي: نفسي بس انا محتاجة عالأقل ألفين جنيه عشان أبدأ و احنا مش لاقيين ناكل. ده أنا في الشتا بخبي عيالي من مايه المطر تحت السرير عشان السقف بينقط عليهم.
بيقولولي حتي لو عملولنا مصنع بسكوت عشان يلم البطالة اللي في القرية, معظم الشباب عاطلين لأن مفيش شغل في القرية و اللي عايز يشتغل لازم يطلع بره القرية و يشتغل.
وحكيتلي علي ظلم الشرطة ليهم قبل الثورة, الشرطة كانت بتضرب اي واحد يطلع من بيته بالليل و كان الضابط بيّلبس اي حد مش عاجبه قضايا مخدرات و كان يدخل عالناس في البيوت و ياخدهم, بس بعد الثورة الضابط ده أتشال و جه مأمور القسم راجل محترم و قالتلي أن دلوقتي في حرية و الدنيا أحسن.


 واحدة ست أشتكت من غياب الأمان و بتقول دلوقتي أسوأ من قبل الثورة عشان غياب الأمان بس متفاءلة أن بكرة أحسن, بيشتكوا أن مفيش أي حد مهتم بالقرية و طلباتهم و مشاكلهم, نفسها أن الرئيس اللي جاي "يضبط البلد" و ميكونش زي اللي قابله اللي أكتشفه أنه مكانش كويس بسبب الفضايح بتاعته اللي بانت بعد الثورة, و بتقولي أن الحكومة اللي شغالة دلوقتي معملتش حاجة و مش قادرة ترجع الأمان تاني.
اجمل ما في القرية الأطفال اشقيا جداً لكن ابرياء جداً و تشوف الأمل في عيونهم البريئة... أنا اتكلمت مع الأطفال عن مدارسهم و مشاكلهم في التعليم و احلامهم , أماني بتقولي هيا مبسوطة في المدرسة و بتحبها بالرغم ان بعض المدرسين بيضربوهم جامد و الفصل بتاعها فيه 38 طالب و كلهم الحمد لله لاقيين مكان يقعدوا, أماني نفسها تطلع دكتورة, أما بقي رحاب رايحة أولي اعدادي بتقول أن المدرسة مش حلوة عشان مستر صابر بتاع الأنجليزي بيكتب الدرس عالسبورة و يخرج من غير ما يشرح و لو طلبوا منه يشرح بيزعقلهم و بيقولهم انهم لازم ياخدوا درس (طبعاً مش هنلوم عليه كل اللوم لأنه أكيد مرتبه ميتين تلتوميت جنيه) رحاب نفسها تاخد دبلوم تجارة عشان معندهاش امكانيات تدخل جامعة ( اللي زي رحاب كتير هنا).
اما بقي مصطفي رايح تانية ابتدائي و مش بياخد موسيقي و مش بيرضوا ينزلوهم الألعاب. و أحمد ابوه طلعه من المدرسة قبل الأمتحانات عشان المدرسة محتاجة فلوس(طبعاً مجانية التعليم دي اكذوبة لأن التعليم لازم له مصاريف تانية غير رسوم المدرسة زي اللبس و الأدوات المدرسية و المواصلات للمدرسة ...إلخ).
الأطفال بيشكوا أن الوجبات المدرسية مش دايماً بياخدوها و ممكن ياخدوا حاجات شبه بايظة, و مرايل المدرسة بتاعة الأيتام بياخدوها (أنا مش عارفة مين اللي بياخدها. أما اسراء فطلعت من المدرسة عشان ببساطة "مفيش فلوس" !!

اليوم ده سجلنا لقاءات كتير مع أهالي القرية (هنشرها تباعاً) و هما انبسطوا جداً أنهم لقوا حد يسمعهم و يوصل صوتهم لأنهم كانوا حاسين بالأهمال و أن مفيش حد بيهتم بيهم أو بيسمعهم أو عايز يعمل حاجة عشانهم.
سألت بعض الناس عن القنوات التليفزيونية اللي بيحبوها  المعظم رد بأنهم بيحبوا و بيتابعوا القنوات الدينية زي "الرحمة" و ناس قالوا بيتابعوا  قناة "الفراعين" و ناس تاني معندهمش تليفزيون أصلاً.
المهم الساعة 6:00 مساءاً كان ميعاد الندوة الثقافية و كان الضيوف الدكتور مأمون البسيوني الروائي و الطبيب المشهور, الفنان المحبوب عمرو واكد و الأستاذ أحمد إمام و هما من مؤسسين "الجبهة القومية للعدالة و الديموقراطية" , وكان موضوع الندوة عن "أهمية المشاركة في الحياة السياسية و ضرورة تكوين رأي مستقل". الناس تجاوبت جداً مع المتكلمين و بعتوا أسئلتهم اللي كان جزء كبير منها عن بكرة هيحصل ايه؟, أحنا دورنا ايه؟, و ناس كتير عملوا مداخلات حكوا فيها عن مشاكلهم و امنياتهم للقرية, و كان في ست جريئة جداً اتكلمت عن مشاكل القرية مثل عدم وجود نادي رياضي للأطفال...و ختمنا الندوة بشعر بالعامية للشاعرة أمل درويش و توزيع الألعاب و الحلويات علي الأطفال.
في نهاية الجزء الأول أحب أقولكم أن الأهتمام بالناس دول حق عينا و علي كل مصري عايز مصر تبقي أحسن, الناس دول مصريين و مصر مش هتنهض و تقوم و تشد الحيل غير لما الناس دول و اللي زيهم ياخدوا ابسط حقوقهم زي العمل و الخدمات الصحية و التعليم. فيه قري كتير في مصر غير العشر الاف, اهتموا بيهم زوروهم أسمعوا مشاكلهم و اتكلموا بلسانهم سلطوا عليهم أي ضوء ده بيفرق معاهم جداً...
أحب أشكر شباب حركة مصر بكرة عشان مجهودهم و كل حد ساعدنا مادياً أو معنوياً عشان نتمم الزيارة دي, أحب أشكر الأطباء المتطوعين اللي استغلوا ساعات طويلة متصلة بدون ملل لخدمة الأهالي, أحب أشكر أهالي المنطقة اللي ساعدونا في توفير المكان و حشد الناس, أحب أشكر المتكلمين اللي لبوا الدعوة و قدموا وجبة جيدة من التوعية للأهالي. أخيراً بأشكر كل شخص بيعمل خطوات جدية في طريق مصر بكره...