الثلاثاء، 10 يناير 2012

بعض المقترحات ليوم 25 يناير 2012 #jan25TWO #25Jan12

يوم 25 يناير 2012  مش هيبقي احتفال بمناسبة "عيد الثورة" لكن هيبقي الموجة الجاية من الغضب و الثورة و لذلك اتمني انه يبقي يوم ناجح و يكون شرارة لثورة الجديدة.. ثورة التحرير.. عندي شوية مقترحات و ملاحظات مش جديدة عليكم لكن من خبرة المظاهرات في السنة اللي عدت. انا كتبتها كلها في تويتات و جمعتها مع بعض هنا:
  • معنديش ادني استعداد بعد الدعاية المرعبة اللي عملناها دي و صحي النوم 25 ده  اخر يوم و الثوار راجعين يوم 25.. يطلع في الأخر اليوم مليونية و احتفال كرنفالي بلا مكاسب حقيقية.
  • افضل حل هو اللامركزية يعني  التظاهرات لا تقتصر علي التحرير و القاهرة فقط بل جميع المحافظات من مطروح حتي الصعيد عشان نقول دي ثورة مصر مش ثورة ميدان التحرير و بس!
  • عمل مسيرات ضخمة في حتت عمرها ما شافت مسيرات و بالذات المناطق الشعبية في القاهرة و المحافظات و المسيرة الناجحة لازم تكون: مبتعطلش الطريق- هتافاتها قوية و موجهة (موجهة يعني احنا في منطقة شعبية و فقيرة يبقي الهتاف بيمس لقمة العيش و الكرامة و العدالة- في منطقة راقية يمس الحرية و الديوقراطية.. وهكذا)- لافتات واضحة بها مطالب المسيرة- توزيع منشورات علي المارة و قائدي السيارات للتوعية.
  •  المسيرات الطلابية و العمالية بأسم جميع جامعات مصر و عمالها لأن الرهان الأن علي كفاح الطلبة و العمال.
  • لازم نترفع عن كل محاولات الأستفزاز من المواطنين الشرفاء و قائدي السيارات خلال المسيرات و التمسك بالهدوء و الأستقطاب لهم. و ياريت مننساش اننا حاملي رسالة الثورة التي تنادي بالكرامة و الأنسانية فلازم نكون ممثلين جيدين للرسالة. و كمان مننساش ان الناس دي مغسول دماغها بالأعلام المضلل و الكذاب و جزء منهم شايفنا بلطجية و جزء تاني شايفنا عيال مضحوك عليها. فلازم نستحمل لو شتمونا او اهانونا و نخلي لافتاتنا و سلميتنا و تحضرنا هيا اللي تتكلم عننا و لو اتيحت الفرصة للنقاش معهم نتناقش بمنتهي الهدوء و القوة و نوضح احنا مين و عايزين ايه.
  • فيه اقتراح عجبني ان انصار الثورة من منازلهم (اللي مع الثورة لكن مش بينزلوا المظاهرات) انهم يمسكوا  لافتات المطالب و صور انتهاكات المجلس و الشهداء  و ينزلوا بيها في وقفات صامتة تحت بيوتهم و في شوارعهم. و يا سلام لو نزلوا بلابتوبات و عملوا عروض كاذبون علي صغير كده.. و ممكن كمان نطبع صور الأنتهاكات و المطالب و نعلقها علي حبال البلكونات علي الشوارع العمومية (فكرة كويسة بردو).
  • تنظيمنا و توحيد صفنا و تمسكنا بالسلمية هو اللي هينجح اليوم, لأن هما عايزين يحرقوا الدنيا و يلزقوها فينا و احنا شايفين الأعلام غسل عقول الناس ان فيه مخطط لحرق مصر و الكلام ده فالناس مهيأة لتصديق الأمور دي.
  • لازم نعمل لجان شعبية منا و موثوق بها لحماية المنشآت الهامة (مثل البنوك- المتاحف- الوزارات...ألخ)
  • تأمين جميع مداخل الميادين و وجود افراد معروفين من الثوار  مشهود لهم و موثوق فيهم للتفتيش و الأشراف و عدم ترك اي بوابة بدون تأمين و لو للحظات مع بدء جمع المتطوعين للجان الشعبية مثلاً من يوم 19 و تقسيم اوقات التطوع وفقاً لعددهم.
  • يفضل عدم وجود منصات في الميدان و اغاني و مظاهر للفرحة لأننا مازلنا في حالة حداد علي شهداءنا و بصفة عامة الترفع عن اي مظاهر للبهرجة لأن الأعلام المضلل ساعتها هيحاول يركز ان الجميع خرجوا للأحتفال بعيد الثورة الأول و مش لأستكمال الثورة.
  • يفضل ان الهتافات كلها تبقي لهدف واحد يتم الأتفاق عليه زي بعد موقعة الجمل مثلاً كان الهتاف الوحيد "الشعب يريد اسقاط النظام".
  • دخول الباعة الجائلين للميدان لازم يبقي مقنن (ازاي معرفش!)
دي بعض المقترحات و ياريت اللي عنده افكار جديدة يتفضل و يحطها تحت البوست ده و هزودها عليه.
ربنا معانا و مــــــكمــــــلين  :)