الثلاثاء، 10 يناير 2012

بعض المقترحات ليوم 25 يناير 2012 #jan25TWO #25Jan12

يوم 25 يناير 2012  مش هيبقي احتفال بمناسبة "عيد الثورة" لكن هيبقي الموجة الجاية من الغضب و الثورة و لذلك اتمني انه يبقي يوم ناجح و يكون شرارة لثورة الجديدة.. ثورة التحرير.. عندي شوية مقترحات و ملاحظات مش جديدة عليكم لكن من خبرة المظاهرات في السنة اللي عدت. انا كتبتها كلها في تويتات و جمعتها مع بعض هنا:
  • معنديش ادني استعداد بعد الدعاية المرعبة اللي عملناها دي و صحي النوم 25 ده  اخر يوم و الثوار راجعين يوم 25.. يطلع في الأخر اليوم مليونية و احتفال كرنفالي بلا مكاسب حقيقية.
  • افضل حل هو اللامركزية يعني  التظاهرات لا تقتصر علي التحرير و القاهرة فقط بل جميع المحافظات من مطروح حتي الصعيد عشان نقول دي ثورة مصر مش ثورة ميدان التحرير و بس!
  • عمل مسيرات ضخمة في حتت عمرها ما شافت مسيرات و بالذات المناطق الشعبية في القاهرة و المحافظات و المسيرة الناجحة لازم تكون: مبتعطلش الطريق- هتافاتها قوية و موجهة (موجهة يعني احنا في منطقة شعبية و فقيرة يبقي الهتاف بيمس لقمة العيش و الكرامة و العدالة- في منطقة راقية يمس الحرية و الديوقراطية.. وهكذا)- لافتات واضحة بها مطالب المسيرة- توزيع منشورات علي المارة و قائدي السيارات للتوعية.
  •  المسيرات الطلابية و العمالية بأسم جميع جامعات مصر و عمالها لأن الرهان الأن علي كفاح الطلبة و العمال.
  • لازم نترفع عن كل محاولات الأستفزاز من المواطنين الشرفاء و قائدي السيارات خلال المسيرات و التمسك بالهدوء و الأستقطاب لهم. و ياريت مننساش اننا حاملي رسالة الثورة التي تنادي بالكرامة و الأنسانية فلازم نكون ممثلين جيدين للرسالة. و كمان مننساش ان الناس دي مغسول دماغها بالأعلام المضلل و الكذاب و جزء منهم شايفنا بلطجية و جزء تاني شايفنا عيال مضحوك عليها. فلازم نستحمل لو شتمونا او اهانونا و نخلي لافتاتنا و سلميتنا و تحضرنا هيا اللي تتكلم عننا و لو اتيحت الفرصة للنقاش معهم نتناقش بمنتهي الهدوء و القوة و نوضح احنا مين و عايزين ايه.
  • فيه اقتراح عجبني ان انصار الثورة من منازلهم (اللي مع الثورة لكن مش بينزلوا المظاهرات) انهم يمسكوا  لافتات المطالب و صور انتهاكات المجلس و الشهداء  و ينزلوا بيها في وقفات صامتة تحت بيوتهم و في شوارعهم. و يا سلام لو نزلوا بلابتوبات و عملوا عروض كاذبون علي صغير كده.. و ممكن كمان نطبع صور الأنتهاكات و المطالب و نعلقها علي حبال البلكونات علي الشوارع العمومية (فكرة كويسة بردو).
  • تنظيمنا و توحيد صفنا و تمسكنا بالسلمية هو اللي هينجح اليوم, لأن هما عايزين يحرقوا الدنيا و يلزقوها فينا و احنا شايفين الأعلام غسل عقول الناس ان فيه مخطط لحرق مصر و الكلام ده فالناس مهيأة لتصديق الأمور دي.
  • لازم نعمل لجان شعبية منا و موثوق بها لحماية المنشآت الهامة (مثل البنوك- المتاحف- الوزارات...ألخ)
  • تأمين جميع مداخل الميادين و وجود افراد معروفين من الثوار  مشهود لهم و موثوق فيهم للتفتيش و الأشراف و عدم ترك اي بوابة بدون تأمين و لو للحظات مع بدء جمع المتطوعين للجان الشعبية مثلاً من يوم 19 و تقسيم اوقات التطوع وفقاً لعددهم.
  • يفضل عدم وجود منصات في الميدان و اغاني و مظاهر للفرحة لأننا مازلنا في حالة حداد علي شهداءنا و بصفة عامة الترفع عن اي مظاهر للبهرجة لأن الأعلام المضلل ساعتها هيحاول يركز ان الجميع خرجوا للأحتفال بعيد الثورة الأول و مش لأستكمال الثورة.
  • يفضل ان الهتافات كلها تبقي لهدف واحد يتم الأتفاق عليه زي بعد موقعة الجمل مثلاً كان الهتاف الوحيد "الشعب يريد اسقاط النظام".
  • دخول الباعة الجائلين للميدان لازم يبقي مقنن (ازاي معرفش!)
دي بعض المقترحات و ياريت اللي عنده افكار جديدة يتفضل و يحطها تحت البوست ده و هزودها عليه.
ربنا معانا و مــــــكمــــــلين  :)

هناك 10 تعليقات:

  1. ايه الحلاوه دى انا فخور بيكى

    ردحذف
  2. أضيفي إلى ذلك
    مجموعات من الشباب تسير حول المظاهرة تعتذر للمحلات عن المرور بالشارع وتبدأ تفهمهم أسباب المظاهرة ومطالبها

    ردحذف
  3. أنا نفسي بس الهتافات تقتصر على هتافات 25 يناير 2011 كدليل على ان النظام ما سقطش و ان ما فيش حاجة اتغيرت
    الاقتراح التاني ان ممكن الناس اللي ما بتنزلش تسجل الهتافات و تحط سماعات الكمبيوتر على البلكونة أو الشبال و تشغل الساوند كليب دة نقدر نقول يعني مظاهرة من منازلهم و لكي مني فائق الاحترام و جزيل الشكر

    ردحذف
  4. اقترح جعل هذا الهتاف, الهتاف الرئيسي

    "الشعب يريد تطبيق الاستفتاء"

    ومش حابب موضوع التضيق علي الباعة الجائلين .. الثورة قامت من اجل هؤلاء

    ردحذف
  5. نقاط قوية جدا للتأثير علي الشارع وهتفيدنا جدا
    اري بعض الاضافات:

    هتاف : الشعب يريد اسقاط حسني مبارك هيكون كويس جدا لانه دليل علي ان مبارك مازال في الحكم
    وجميل فكرة الهتاف علي حسب المنطقة والشريحة المخاطبة


    بس انا مش عارف ايه هي آلية تنفيذ الكلام ده..يعني مين هيكون مسئول عن تنظيم الهتافات واماكن المسيرات والتنسيق مع الطلاب والعمال

    أرجو الاستعانة بمقال علاء الاسواني المنشور اليوم لتحديد نقاط النقاش مع الغضابين من المواطنين
    http://www.almasryalyoum.com/node/592821
    محددة وواضحة حتي لا نخرج الي حوارات جانبية عقيمة

    الاتفاق علي نهاية اليوم مهم جدا هل هو اعتصام ام مجرد مظاهرات لان من المتوقع ان غالبا القوي الدينية ستكون موجودة للاحتفال فقط ولحظة انسحابهم من الميدان باعدادهم الكبير بتؤثر علي بعض الاشخاص الراغبين في الاعتصام وممكن يمشوا

    اخر نقطة وهو رأي شخصي محض ممكن تختلفوا معايا فيه
    لكني أري ان من عيوب الحركة الثورية عدم وجود قيادة تتحدث باسمها ومن ثم يأخذ العسكر ذلك ذريعة لان يتفاوض مع الاحزاب التي لا تمثلنا وعند خروج بعض الكلمات الرنانة في الاعلام نفقد الشارع مرة اخري بحجة"اهم عملوا اللي انتوا عايزينه قاعدين ليه تاني"
    فأري انه يجب اختيار اشخاص يجتمع عليهم الميدان ويكون اختيارهم من منطلق الهتافات المحددة اللي اتكلمت عنها ماريان ويكون اشخاص لا خلاف عليهم بين الثوار..مثل علاء الاسواني وزكريا عبد العزيز وحسام عيسي مثلا
    لتوصيل طلبات الميدان من الميدان مش من المكاتب الفاخر للاحزاب

    وشكرا جزيلا علي الاهتمام بتنظيم اليوم والا يكون يوما عفويا :)

    ردحذف
  6. خبر عاجل :
    اعلنت وزارة الصحة فى بيان لها انه رغم كل الجهود المبذولة لفصل التوأمين مسلم و مسيحى فقد فشلت العملية الجراحية و قرر طاقم الاطباء الغاء العملية بعد ان اكتشفوا ان التوأمين لهم قلب واحد لا يمكن تقسيمه ... من جهة اخرى قد صرح التوأمان انهما قررا ان يعيشا ملتصقين الى الابد منقول

    ردحذف
  7. المجلس "بيجهز" لأحتفالات عيد الثورة, الحل اننا كلنا ننزل لابسين اسود عشان نقوله لا احتفالات علي دماء الشهداء. حقهم اولاً
    زل باسود وكمان نعوش للشهدا اللي ماتوا واللي لسه حقهم ماجاش من القتلة

    ردحذف
  8. - أشكرك جدا .. حاسة بى :) .. أنا لسانى داب ولسة :)
    - لابد من التطوع لأمن المسيرات لحمايتها من أبناء مبارك الشرفاء ..
    - توحيد المطالب (وهى معروفة) ولكن للتأكيد عليها وطباعتها ونشرها وإعلانها بكل الطرق المتاحة.
    - بطريقة او بأخرى: جمع تبرعات مننا للإعاشة(مياه - مستلزمات طبية - ...) مع حد فى الساقية مثلا .
    - عاجبنى اللبس الاسود .
    شكرا ليكى على فكرتك ومجهودك وأحب أطمنك ان اللجان الشعبية هتشتغل برده .. ممكن نساعدهم
    @minafekry

    ردحذف
  9. راكب مع سواق تاكسي النهار ده كان مرعوب من يوم 25 قعد يقول لي هيحرقوا الأقسام و الشرطة لو نزلت التحرير هيتقتلوا..
    أنا شايف ان أهم نقطتين هم اللامركزية و تغيير وجهة المظاهرات تماماً عن ميدان التحرير... التظاهر يبقى متحرك و في أكتر من مكان في نفس المحافظة في نفس الوقت... السلمية أمر مفروغ منه.
    المهم بقى تساؤل.. على أرض الواقع ما مدى قابلية حدوث ذلك فعلاً ؟ و ايه هي الآليات اللي معانا لتحقيق ده ؟
    الموضوع محتاج حافز طازة عشان الناس بتنسى بسرعة مع العلم انه بالتأكيد المجلس العسكري هيدينا كذا مخدر طازة قبل 25...
    إحنا فين من قابلية حدوث ثورة جديدة ؟ كام من 10 ؟ (بواقعية أرجوكم)

    ردحذف
  10. افكار حلوة طبعا

    ونفسي نفسي يكون هناك أحياء للثورة فى كل الميادين والشوارع وليس ميدان التحرير فقط

    كمان لو فيه اى مسيره ياريت يكون التنبيه على كل الناس بالحضور بالزى الأسود زى ما كنا بننزل وقفات خالد سعيد . وزى ما نزلنا الانتخابات بالاسود برده تخليذا لذكرى الشهداء

    كمان ياريت يكون هناك دعوه لكل الناس فى بيوتها بأنها تضع علم مصر فى البلكونه بتاعتها

    ردحذف