م الأخر...: لقطة ضوء.. زيارة لعمال مصانع الطوب في التبين

قررت حركة مصر بكرة ان جزء من دورها كحركة تنموية توعوية انها تهتم بمساعدة المصريين اللي محدش بيساعدهم ونادراً ما حد بيسلط عليهم الضوء لأن طول ما فيه فقر وجوع ومرض في مصر مش هتتقدم. والأيام اللي فاتت اثبتتلنا ان من لا يملك قوته لا يملك قراره عشان كده قررنا نبدأ نهتم بفئة محدش يعرف عنهم حاجات كتير بالرغم من انهم بيعملوا حاجات مهمة للبلد و كفاحهم لازم يتحكي عنه, زي عمال مصانع الطوب في منطقة التبين في حلوان غرب القاهرة. صناعة الطوب لأنها من الصناعات الملوثة للبيئة بتبقي علي اطراف المدن و منطقة زي حلوان مشهورة بمصانع الحديد والصلب والطوب, وده مخليها من المناطق اللي نسبة الثلوث فيها عالية جداً والحياة فيها صعبة, بالرغم من الحياة دي عمال مصانع الطوب مقيمين هناك لأنهم جايين من مناطق وقري بعيدة فلازم يقيموا في اماكن المصانع, اللي لك ان تتخيل الأتربة والتلوث و البيئة هناك عاملة ازاي ده غير غياب الرعاية الطبية بشكل سيئ جداً
اسوأ مافي الأمر هو ان العمال ملهومش اي حقوق و هم شبه ملك صاحب المصنع يعني صاحب المصنع بيعمل بيهم اللي عايزه . ملهومش اي تأمين اجتماعي او صحي واجورهم علي هوا صاحب المصنع وياويلهم لو فكروا مجرد التفكير انهم يطالبوا بحقوقهم.. من فترة حصل حادث لحد من العمال انه وقع من فوق, صاحب المصنع خاف انه يدخل في سين وجيم لو جات الأسعاف تشيل الراجل و سابوه و للأسف مات,, فيه كذا قصة تاني مشابهة ...

حاولنا نجمع دكاترة متطوعين وعملنا قافلة طبية مجانية بالتنسيق مع جمعية "روح الشباب" يوم السبت 31-03-2012 و هي جمعية اهلية مرخصة شغالة هناك من 6 سنين علي مساعدة العمال وخدمتهم وعلي محو الأمية عن طريق "التعليم غير النمطي"..بدأ توافد العمال علي القافلة الطبية و سنهم مابين 8-50 سنة. الأطفال الصغيرين سن 8-10 -15 سنة معظمهم شغالين في رش الرمل علي الطوب الطري عشان ميلزقش في بعضه اثناء الأنتقال في الطريق للفرن. كل العمال بيشتكوا من الأمراض الصدرية و العضم والعيون نتيجة لكمية التلوث الرهيب اللي عايشين فيه, كفاية منظر العمال نفسهم من كتر التراب تحس انهم بقوا بلون الأرض اللي هم فيها... بدأنا نتكلم مع العمال المنتظرين الكشوفات, واحد منهم كان خايف اننا نصوره ونبعت الصور "لأمريكا" " عشان منشوهش صورة مصر واما سألناه وانت هتشوه صورة مصر بأيه قال عشان شكلي مبهدل ومش نظيف وطبعاً فهمناه انه فخر لمصر وان دايماً العمال السمر الشقيانين هم رمز كفاح مصر... واحد منهم قال لأحد زملاءنا انه بيغير منه عشان هو بيلبس كويس وياكل كويس وشغال كويس. واحد تاني قال. الثوره خربت بتنا و وقفت حال البلد ...هو احنا كنا اخدنا ايه من الثوره ...كل حاجه ماشيه بالوسطه هنا و في كل حته.

واحد قال احنا جينا الحياة بعد ما استكفت وواحد تاني كان بيقول على زميله دا ريس العمال دا بيقبض ييجي 1000 جنية!!
زميلنا سأل واحد انت بتشتكى من ايه " ايه اللى وجعك " قال شوف انت بس انا حاسس انى تعبان وعاوز اكشف ... واصعب حالة شوفتها ان واحد كانت عنيه صفرة جامد فالدكتور كشف عليه وقاله انت احتمال يكون عندك تليف فى الكبد ...وواحد تانى قال انهم بيشيلوا الطوب بعد مايطلع من الفرن وهوه سخن " من غير جاونتى

زميل إتكلم مع واحد متجوز وسأله إنت بتحلم بإيه؟ قال ولا حاجة... قاله نفسك فإيه؟ قال ولا حاجة.. أنا نفسي الدنيا تبقى أحسن والناس تحب بعض وتخاف على بعض زي زمااان ويبقى الوضع أحلى والناس متعمل مظاهرات وقلق.. عملنا زي ورشة عمل كان الأطفال بيكتبوا فيها امنياتهم, فيه واحد كتب " نفسي ابقى عالم سياسي عشان أساعد بلدي مصر"... المهم أغلبهم قال في الأول إنهم عايزين يبقوا ضباط ولما سألنا ليه؟؟ واحد رد وقالي عشان يبقالي هيبه فقال زميلناا عشان الناس تخاف منك يعني؟؟؟ سكت وقعد يفكر وكلهم لما جم كتبوا محدش كتب نفسي أبقى ضابط ، الأغلبية كتبوا نفسي أبقى مهندس وواحد كتب نفسي أبقى دكتور عشان أساعد الناس.. اجمل حد قابلناه في اليوم ده هو "خلود" خلود بنت جميلة بريئة عندها 8 سنين بس للأسف عندها مشكلة فى الجهاز العصبى مصابة بشلل حركي مش بتقف ولا بتمشي لأنه عندها ضمور في جزء من خلايا المخ..وعندها مشكلة فى النطق وابوها عامل بسيط معندوش فلوس يكشف عليها او يعالجها خلود طلعلها قرار علاج على نفقة الدولة..وفعلا اتعالجت فترة واستجابت للعلاج وحالتها اتحسنت وبعدين القرار اتوقف فجأة, مشكلة خلود لازم متابعة..يعنى لازم أخصائى مخ واعصاب يتابع حالتها خلود بتعرف تضحك وتغني بالرغم من كل ده . اللي زي خلود كتير هنا..

و ده جزء من الحالات المطلوب التطوع لمساعدتهم:

طه محمد محمود 23 سنة - عامل في مصنع طوب في التبين مصاب بأرتكريا في كامل جسمه وحالته متأخرة جداً,, بحاجة لمساعدة طبية.

شعبان عبد النبي عيد 13 سنة- محتاج دكتور رمد.

حسن محمد مرسي- اوائل الثلاثينات- اشتباه في حالة عمي- بحالة لطبيب لتبني الحالة.

احمد شعبان سيد- 11 سنة- سمعه ثقيل و عينة الشمال ضعيفة وجاحظة بحاجة لطبيب رمد و طبيب أذن لتبني الحالة

الناس دول محتاجين اشد الأحتياج لحد يزورهم و يسمع مشاكلهم ويسلط عليهم اقل ضوء, بيفرق معاهم جداً انهم يلاقوا حد يحس بيهم و يخفف عنهم.. عدد المصانع في منطقة التبين فوق ال200 مصنع و كل العمال عندهم نفس الظروف الصحية والحياتية المتردية.

نداء لأي حد يقدر يعمل حاجة... العمال دول امانة اننا نساعدهم, نداء للحقوقيين و المهتمين بشئون العمال في مصر. العمال محتاجين توعية حقوقية, لأنهم صدقوا فكرة انهم ملك صاحب العمل يفعل بهم ما يشاء وده بيتم استغلاله اسوأ استغلال من قبل اصحاب المصانع. واصحاب المصانع بيقاوموا اي محاولة لتحسين وضع العمال عشان ميخرجوش عن طوعهم. نداء للجمعيات الأهلية اعملوا قوافل طبية وفصول محو امية للعمال واولادهم, ساعدوهم بكل السبل, نداء للأطباء لو حد يقدر يساعد الحالات المذكورة بالأعلي.مصر مش هتقوم و تقف علي رجلها و قلبها مكسور بالفقر والجوع والمرض. مساعدة الفئات دي واجب وليس تفضل..من فضلكم لو حد يحب يساعد او عايز يتواصل مع جمعية روح الشباب يتفضل بعرض المساعدة الممكنة كتعليق علي البوست ده وانا هوّصله بالناس اللي بتشتغل.. سأحاول نشر باقي الصور و الفيديوهات تباعاً..إلي اللقاء